HEADLINE

LIME (5) MANFAAT NGUPI BAGI BUDAYE SEMENDE


Redaksi kabarSEMENDE

Bagi kite jeme semende, ngupi lah jadi tradisi njak dulu. Ase pening pale ame lum ncecalkah bibie ke gelas kupi. Ape lagi ame pepagian, udim sholat subuh, lum kah segale gawi: pokoknye ngupi kudai.

Kupi adalah tradisi bagi kami semende, sekaligus pule jati diri. Dari sini kami serupe belipat pade kultur budaye kami sebagai suku yang telah melekat dengan alam. Dengan bentang raye alam perkebunan.



Dari situ, redaksi kabarSEMENDE mencatat lime (5) manfaat 'ngupi' bagi budaye kite/kami semende:

1. Ngupi sebagai alat silaturahmi

Lah njak dulu kalu kite midang atau ngerayau atau berayak badah tetangge atau sanak keluarge, dek lame duduk di ruang tamu, lah "kekinting" suahe sidu beradu nga gelas. Dek beselang lame lah nimbul nian njak arah dapuw, talam plastik behisi gelas-gelas kupi angat, merepuy asapnye. Merubah aura ruang tamu. Di sini kupi kemudian berperan sebagai pemanis ubrulan sekaligus membuat likat kental silaturahmi. Ame lah disuguhi kupi di ruang tamu: ye nggelatak, saye nggelatak. Ye, pendiam laju bemunyi dikit mulutnye. Ye, cecingil bingil, tambah tesingit bibienye. Pukuknye, suasane jadi idup, jadi tambah akrab. Jadilah kupi sebagai pelikat silaturahmi.

2. Ngupi sebagai ubat sakit pale

Ame mamangan balek temalam njak kebun, udim behadu jerang, sambil duduk di tengah humah kemudian meluhut kening. Kate mamangan, "Nduk, alakah pening pule pale ni.."
Dek lame ibung nimbul njak dapuw, mbawe gelas besak behisi kupi likat, lah cadur kanye depan mamangan. Kate ibung, "Ngupilah kudai, kalu abis hebuk kawe di kebun.."
Mamangan nimbal, "Au, ngguk nian, lah tige ahini dek ngupi..!"
Sesaat kemudian pening palak mamangan hadu sebegasan sate te embau nga kupi angat, lenyap segelas besak, luk nepungi awak selame tige ahi dek ngupi. Kupi, akhirnye jadi ubat pening pale. Ibungan hule sanjungan.

3. Ngupi sebagai penyemangat begawi

Sate cuguk tiduk, udim sholat subuh, kite lah nunggui gelas kupi. Sambil beramu nunggu sarapan, kah berangkat ke ume atawa kebun. Sate ahi nyantak, mulailah bepakpuk begawi, besiang atawa nebas belukae pakis kanek mbuat kebun kecik. Anye sate jam 11, lah ade ye telaung: "Uuuyyy, payu behadu kudai jerang, ngupi kudai dikit mangke tambah gedang kite begawi.."
Dek lame kemudian, lah nunggui gelas kupi, sebelum masuk tengah ahi. Behadu senampur, ngupi dikit (anye gelasnye besak) terus ngulang begawi senampur agi, udim tu empai ndahat makan siang. Ngupi memang membuat tambah semangat begawi. Ganjalnye li kupi segelas, kadang busung dek tehase lapae, begawi sampai tampun tekap sepematang.

4. Ngupi sebagai ubat penakut

Malam minggu, bujang atung atung beluluwan tuhun tangge. Rencane kah merasani gadis, kalu kalu pacak kanek kance idup. Lah lame mbujang di talang, lah lame pule behayal nak nganggau. Di ujung tengah laman, berenti, berupuk jerang: ngape ase ade tu tinggal. Anak mate bebalik ke dangau, temenung dikit sambil natap sunggaran lah bepalit minyak belange di lelubun. Terus, ngulang naik agi ke tangge, ngambek bajik-an baling duahe. Plastik itam isinye gule seperapat nga hebuk kawe hulean ngiruh petang tadi. Berangkat bujang atung atung ke badah gadis, mentalnye tambah gedang karne ade tatingan. Sampai di humah gadis, lah tecadur pule gelas kupi, lum kah behani ngumung ame belum nyapsap kudai ayik itam. Udim tu empai becingut, lengit dikit rase takut.

5. Ngupi sebagai pengusir beretih (tukang maling)

Sebelum ahi malam, di ruang tamu nga apid jurai, berenap nunggui gelas kupi. Dek kah kurang selusin gelas bajik-an nining di kale dalam kutak laju dikeluaekah untuk njamu tamu. Beratrit suahenye, mepuy asap lintingan merk NIRWANA.
Ame beretih lah njak masuk malam tadi besimbun baling humpun pisang. Ngimbangkah jeme ngguk lingah. Tujuan beretih ni nak maling sangkalan, ndek mbuat sambal sebab die kah temalam di kebun. Setelah penghuni huma sepi, beretih masuk wah belakang, bekelikkaw mbukak kancing jendile dapuw. Sesaat jendile tebukak, kemudian die melumpat ke dalam, anye na'as, tehijak talam behisi gelas-gelas kupi ye lum dibasuhi. Tekeruncang talam kaling, temerawraw gelas kupi berandai pecah. Tuan humah cuguk gacang nyintak gerahang, beretih kapae tekanjat langsung melumpat keluae agi, kunam belahi. Urung maling sangkalan.

Demikianlah catatan redaksi kabarSEMENDE tentang 5 manfaat ngupi bagi kite Semende. Semoga tulisan-tulisan kami selanjutnye semakin menambah wawasan dan semakin meramaikan situs jeme kite ini. Salam Redaksi

No comments